A Lei 3/2012, do 2 de abril, do deporte de Galicia, establece na súa disposición transitoria única a obriga de que todas as entidades deportivas de Galicia adapten os seus estatutos e regulamentos ao disposto nesta lei no prazo dun ano a partir da súa entrada en vigor.

O Decreto 85/2014, do 3 de xullo, polo que se aproba o Regulamento do Rexistro de Entidades Deportivas de Galicia, establece no seu artigo 3 que o Rexistro de Entidades Deportivas de Galicia é un rexistro administrativo dependente do órgano superior da Administración xeral da Comunidade Autónoma de Galicia con competencias en materia de deporte.

O citado decreto, no seu artigo 5.1.b), recolle entre os actos obxecto de asentamento e inscrición no Rexistro os estatutos das entidades deportivas de Galicia e as súas modificacións.

Este decreto regula na súa disposición transitoria terceira que:

1. As entidades inscritas no Rexistro de Entidades Deportivas de Galicia deberán comunicar ao Rexistro, dentro do prazo de un ano desde a entrada en vigor do presente regulamento, todos os actos e datos de obrigada inscrición que non estivesen inscritos.

2. No suposto de que non se realice a mencionada comunicación dentro do prazo fixado no punto anterior, procederase de oficio ao anuncio de incoación do expediente de cancelación rexistral. A relación de entidades obxecto deste expediente publicarase no Diario Oficial de Galicia, sen prexuízo da notificación individual no domicilio da entidade inscrita.

3. No suposto de que as entidades, no prazo de dous meses desde a publicación do mencionado anuncio, non formalicen a obrigación establecida no punto primeiro, procederase á súa cancelación rexistral, que comportará a perda do recoñecemento oficial das entidades inscritas.

Unha vez transcorridos os prazos establecidos nas normas citadas, a Secretaría Xeral para o Deporte revisou o Rexistro de Entidades Deportivas de Galicia.

Do resultado desta revisión comprobouse que as entidades deportivas de Galicia inscritas e que figuran no anexo I do presente acordo non levaron a cabo a adaptación dos seus estatutos á Lei 3/2012, do 2 de abril, do deporte de Galicia.

A competencia para a tramitación e resolución deste procedemento correspóndelle á Secretaría Xeral para o Deporte, segundo o disposto no artigo 5.1.g) e no capítulo III da Lei 3/2012, do deporte de Galicia, e no Decreto 85/2014, do 3 de xullo, polo que se aproba o Regulamento do Rexistro de Entidades Deportivas de Galicia.

A tramitación do procedemento levarase a cabo de acordo co disposto na Lei 39/2015, do 1 de outubro, do procedemento administrativo común das administracións públicas, na Lei 3/2012, do 2 de abril, do deporte de Galicia, no Decreto 85/2014, do 3 de xullo, polo que se aproba o Regulamento do Rexistro de Entidades Deportivas de Galicia, e na demais normativa de xeral aplicación.

Con base na lexislación aplicable no presente caso,

ACORDO:

Primeiro. A incoación do expediente de cancelación rexistral ás entidades deportivas que figuran no anexo I da presente resolución por non adaptaren os seus estatutos á Lei 3/2012, do 2 de abril, do deporte de Galicia.

Segundo. Que se publique no Diario Oficial de Galicia a incoación da cancelación rexistral co seu anexo. Esta publicación terá os efectos da notificación, consonte o artigo 45 da Lei 39/2015 do 1 de outubro, do procedemento administrativo común das administracións públicas.

Terceiro. As entidades deportivas que figuran no anexo I terán un prazo de dous meses contados desde a publicación do mencionado anuncio para adaptar os seus estatutos e regulamentos ao disposto na Lei 3/2012, do 2 de abril, do deporte de Galicia, e comunicalo ao Rexistro de Entidades Deportivas.

Cuarto. A presentación dos estatutos modificados deberá realizarse obrigatoriamente por vía electrónica a través do formulario normalizado dispoñible na sede electrónica da Xunta de Galicia (https://sede.xunta.gal), procedemento PR946B, Modificacións do rexistro de entidades deportivas, e de acordo co establecido nos artigos 27 da Lei 11/2007, do 22 de xuño, de acceso dos cidadáns aos servizos públicos, e 24 do Decreto 198/2010, do 2 de decembro, polo que se regula o desenvolvemento da Administración electrónica na Xunta de Galicia e nas entidades dela dependentes.

Para a presentación das solicitudes poderá empregarse calquera dos mecanismos de identificación e sinatura admitidos pola sede electrónica da Xunta de Galicia, incluído o sistema de usuario e clave Chave365 (https://sede.xunta.es/chave365).

Se algunha das entidades interesadas presenta a súa solicitude presencialmente, será requirida para que a emende a través da súa presentación electrónica. Para estes efectos, considerarase como data de presentación da solicitude aquela en que fose realizada a emenda

Quinto. Transcorrido ese prazo sen comunicar esa adaptación, procederase á súa cancelación rexistral, que comportará a perda do recoñecemento oficial da entidade inscrita.